"Монголын хөрөнгийн бирж" ТӨХК-ийн “Үнэт цаасны бүртгэлийн журам”-ын 23.11 дэх заалтанд үнэт цаасны хөрвөх чадвар муудсан, Биржээс тогтоосон шалгуур, шаардлагыг биелүүлж чадахгүй болсон нь тогтоогдсон, бүртгэлтэй байх хугацаанд тогтмол биелүүлэх үүрэг болон хууль, дүрэм, журам, гэрээгээр, хүлээсэн үүргээ удаа дараа биелүүлээгүй, жилийн үйлчилгээний хөлсийг 2 жилээс дээш хугацаанд төлөөгүй, үнэт цаасны арилжааг зогсоосноос хойш 1 жилээс дээш хугацаанд арилжаа сэргээгүй буюу арилжааг зогсоох нөхцөл шалтгаан нь арилаагүй зэрэг болон хууль журамд заасан бусад үндэслэлээр үнэт цаасыг Биржийн бүртгэлээс хасна гэж тусгасан байдаг.

Дээрх журмын дагуу үнэт цаасны бүртгэлийн шалгуур, шаардлага хангахгүй байгаа нийт 42 компанид 2020 оны 12 сарын 01-ний дотор журмаар хүлээсэн үүргээ биелүүлж ажиллах, цаашид авч хэрэгжүүлэх арга хэмжээний төлөвлөгөө ирүүлэх талаар хугацаатай үүрэг даалгаврыг өгсөн билээ.

Энэхүү заасан хугацаанд МХБ-д хариу ирүүлээгүй, холбогдох зөрчлийг арилгаагүй компаниудыг бүртгэлээс хасах хүртэл арга хэмжээ авах тул холбогдох журам, гэрээгээр хүлээсэн үүргээ биелүүлж, журмын шалгуур, шаардлагыг хангаж ажиллахыг “Монголын хөрөнгийн бирж” ТӨХК-ийн зүгээс тус компаниудад дахин анхааруулж байна.

МОНГОЛЫН ХӨРӨНГИЙН БИРЖ