Энэ онд ХААБ-ээр дамжуулан 20 төрлийн түүхий эдийг 700 тэрбум төгрөгөөр арилжсан байна.

Энэ нь өмнөх оноос 22.7 хувиар өссөн үзүүлэлт болж байгаа юм. Түүхий эдүүдийн үнэ энэ онд 30-70 хүртэлх хувиар өссөн нь арилжааны дүн нэмэгдэхэд нөлөөлсөн гэж ХААБ мэдээллээ. Мөн энэ онд хийсэн нийт арилжааны 82.3 хувийг боловсруулаагүй цайвар болон бараан ноолуурын арилжаа бүрдүүлсэн. Эдгээр түүхий эдийн үнэ өмнөх оноос 60 гаруй хувиар өссөн байна. Цаашдаа малчид ноолуурын чанартаа илүү анхаарч дотоодын үйлдвэрлэгчдэдээ нийлүүлэх, мөн боловсруулж, нэмүү өртөг шингээж экспортлох шаардлагатай байгааг салбарынхан онцолж байгаа. Энэ онд биржээр дамжуулж зөвхөн ноос ноолуурын арилжаагаар зогсохгүй малчдын хоршоо, арьс ширний үйлдвэр, махны үйлдвэр, худалдаа, нийтийн хоолны байгууллагуудын эрэлт нийлүүлэлт, нөөцийн судалгааг гаргаж, мал нийлүүлэх захиалгыг малчдын хоршоодод өгч, махны үйлдвэрүүдэд нийлүүлсэн. Ирэх онд ч мөн мал, мах, арьс шир худалдах, худалдан авах талуудын захиалгын дагуу форвард арилжаа зохион байгуулахаар төлөвлөсөн байна.

Эх сурвалж: BloombergTv.mn